ދިވެހި ލޭ ހިނގާހާ ހިނދަކު ދިވެހި ބަސް ދެމިއޮންނާނެ: ޑރ. އަޝްރަފް

ދިވެހި ލޭ ހިނގާހާ ހިނދަކު ދިވެހި ބަސް ދެމިއޮންނާނޭ ކަމަށް ދިވެހިބަހުގެ އެކަޑަމީގެ ރައީސް ޑރ. އަޝްރަފް ޢަބްދުއްރަޙީމް ވިދާޅުވެއްޖެއެވެ.

އަޙްމަދިއްޔާ އިންޓަރނޭޝަނަލް ސްކޫލްގައި ބައިނަލްއަޤްވާމީ މާދަރީ ބަހުގެ ދުވަސް ފާހަގަކުރުމަށް މިއަދު  ބޭއްވި ޚާއްޞަ އެސެމްބްލީގައި ވާހަކަދައްކަވަމުން ޑރ. އަޝްރަފް ވިދާޅުވީ ދިވެހި ބަސް އުވިދާނެ ކަމަށް ބަހުގެ ބައެއް ބޭފުޅުން ވެސް ވިދާޅުވާ ކަމަށާއި، އެހެން ނަމަވެސް އެ ކަމުގައި އޭނާގެ ވިސްނުން މުޅިން ތަފާތު ކަމަށެވެ. އެގޮތުން ކޮންމެ ބަހަކަށް ވެސް ބޭރު ލަފުޒު ވަންނަކަމަށާއި، އިނގިރޭސި ބަހުގައި ވެސް ގިނައީ ބޭރުލަފުޒުތައްކަން އޭނާ ފާހަގަކުރެއްވިއެވެ.

ޑރ.އަޝްރަފްގެ ވާހަކައިގައި ބޭރުބަސް ދިވެހިކުރުމަކީ މައްސަލައެއް ނޫންކަން ފާހަގަކުރައްވައި ދިވެހިބަހުގެ ލަފުޒު އުފެދޭ ގޮތްތަކާއި ދިވެހި އަޑަށް ފައްތައިގެން ދިވެހިކޮށްފައިވާ ބައެއް ބޭރު ލަފުޒުތައް ދިވެހިވެފައިވާ ގޮތަށް ބައްލަވައިލެއްވިއެވެ.

ދިވެހި އިހުގެ އަދީބުންނަށް ތަޢުރީފުކުރައްވަމުން  އަޙްމަދިއްޔާ އިންޓަރނޭޝަނަލް ސްކޫލުގެ ކުރީގެ ދިވެހި މުދައްރިސް ޑރ. އަޝްރަފް ވިދާޅުވީ އެންމެ ވަރުގަދަ އަދަބިއްޔާތު އޮންނަ ބަސްބަސް ކަމަށް ވާހަކަދެކެވޭ އިނގިރޭސި ބަހާއި އަރަބި ބަހުގެ އަދަބިއްޔާތަށް ގޮންޖަހާލެވޭ ވަރުގެ އަދަބިއްޔާތެއް ދިވެހިބަހުގައި އެބައޮތް ކަމަށެވެ.

އެގޮތުން ދިވެހި އަދަބިއްޔާތުގައި ހިމެނޭ ވަޒަންބަހުރުވައިގެ ބައިތައް ހައްދަވާފައިވާ ފުރިހަމަކަން ޅެމުން މިސާލުދައްކަވަމުން އޭނާ ފާހަގަކުރެއްވިއެވެ. އޭނާ ވިދާޅުވީ ދިވެހި އަދަބިއްޔާތުގެ ބައިތަކުގެ އެތެރެފުށާއި ބޭރުފުށުގެ އަސަރުއުފެއްދާފައިވާ ގޮތް އެ އަދަބިއްޔާތުތަކަށް ވުރެ މާ ފުރިހަމަ ކަމަށެވެ.

މިއަދުގެ އެސެންބްލީގައި ޑރ. އަޝްރަފް ވަނީ އަޙްމަދިއްޔާގެ ދަރިވަރުންގެ އަދަބީ ހުށަހެޅުންތަކަށް ވަރަށް ބޮޑަށް ތަޢުރީފުކުރައްވާފައެވެ.