އަޙްމަދިއްޔާގެ ޑެޕިއުޓީ ޑިރެކްޓަރ ޝާކިރ ސަރ ކުއްލި ގޮތަކަށް ނިޔާވެއްޖެ

އަޙްމަދިއްޔާ އިންޓަރނޭޝަނަލް ސްކޫލުގެ ޑެޕިއުޓީ ޑިރެކްޓަރ އިބްރާހީމް ޝާކިރު ކުއްލި ގޮތަކަށް ނިޔާވެއްޖެއެވެ.

46 އަހަރުގެ ޝާކިރު ސަރ އަކީ އަޙްމަދިއްޔާއިން ސާނަވީ ތަޢުލީމް ނިންމެވުމަށްފަހު އިޚްލާސްތެރިކަމާއެކު މި ސްކޫލަށް ޚިދުމަތްކުރެއްވުމުގައި މެދުނުކެނޑި 26 އަހަރު ހޭދަކުރައްވައި ސްކޫލުގެ ވެރިންނާއި މުދައްރިސުންނާއި ދަރިވަރުންނާއި ބެލެނިވެރިންނާއި މުޅި އަހުމަދިއްޔާ އާއިލާގެ އިތުބާރާއި ލޯބި ހޯއްދަވާފައިވާ ލާމަސީލު ޚިދުމަތްތެރިއެކެވެ.

1 ފެބުރުއަރީ 1997 ގައި ލައިބްރޭރިއަނެއްގެ ގޮތުގައި މި ސްކޫލާ ގުޅިވަޑައިގެންނެވި ޝާކިރު ސަރ ނިޔާވިއިރު ހުންނެވީ ސްކޫލުގެ ޑެޕިއުޓީ ޑިރެކްޓަރ ކަމުގެ މަގާމުގައެވެ. މި ވޭތުވެދިޔަ 26 އަހަރު ޝާކިރު ސަރ ވަނީ މި ސްކޫލަށް އިޚްލާސްތެރި މަސައްކަތްތަކެއް ކުރައްވާފައެވެ. އެގޮތުން ސްކޫލްގެ އޯލެވެލް އަދި އޭލެވެލް އިމްތިޙާންތަކުގެ ކަންތައްތައް ބެލެހެއްޓެވުމާއި ޕްރީ ސްކޫލްގެ ރެޖިސްޓްރޭޝަންގެ މަސައްކަތްތަކާއި ޕްރިންޓުކުރުމާ ގުޅޭ އެންމެހައި ކަމެއް ސްކޫލުން ކުރަމުންދަނީ ޝާކިރު ސަރގެ ބެއްލެވުމުުގެ ދަށުންނެވެ. މީގެ އިތުރުން ވެސް އެތައް އެތައް ޚިދުމަތްތަކެއް ޝާކިރު ސަރ ގެންދެވީ ސްކޫލަށް ކޮށްދެއްވަމުންނެވެ.

ޝާކިރު ސަރ ރޭ ނިޔާވިއިރު، މި ސްކޫލުގެ މަތީ ސާނަވީ ދަރިވަރުންނާއެކު އުފަން ރަށް ލ.ގަމަށް ކުރި 4 ދުވަހުގެ ތަޖުރިބާ ދަތުރަށްފަހު އެނބުރި މާލެ ދުރުވީ ރޭގައެވެ.
ހާޓް އެޓޭކެއްގައި ކުއްލި ގޮތަކަށް ޝާކިރު ސަރ ނިޔާވި އިރު އަނތްބަކާއި 4 ދަރިން ދުނިޔޭގައި އެބަތިއްބެވިއެވެ.

މި ހިތާމަވެރި ދަނޑިވަޅުގައި ޝާކިރު ސަރގެ ޢާއިލާއާ އެކު އަޙްމަދިއްޔާ އިންޓަރނޭޝަނަލް ސްކޫލްގެ ޕްރިންސިޕަލް މުޙައްމަދު ރަޝީދާއި މުޅި އަހުމަދިއްޔާ ޢާއިލާ އޮތްކަމުގެ ޔަގީންކަން އަރުވަމެވެ.

އަޅުގަނޑުމެންގެ އިޚްލާސްތެރި ދުޢާއަކީ ޝާކިރު ސަރގެ ފާފަފުއްސަވައި ސުވަރުގޭގެ އެންމެ މަތިވެެރި ނިޢުމަތް މާތް ﷲ ޝާކިރު ސަރ އަށް މިންވަރުކުރައްވައި އަޅުގަނޑުމެންނަށާއި އާއިލާއަށް ކެތްތެރިކަން މިންވަރުކުރެއްވުމެވެ.