ތަރުބިއްޔަތާއި ރިވެތި އަޚުލާގު އުނގަންނައިދިނުން: ސްކޫލްތަކާއި ބެލެނިވެރިންގެ މުހިންމު ރޯލު

ރަނގަޅު ތަރުބިއްޔަތާއި ރިވެތި އަޚުލާގަކީ ދަރިވަރުންގެ އިލްމީ ކުރިއެރުމާއި ކާމިޔާބީ އަށް ނުހަނު މުހިންމު ދެ ސިފައެވެ. އެއީ ދަރިވަރުންގެ ޝަޚްޞިއްޔަތު ބައްޓަން ކުރުމަށާއި ދަރިވަރުންނަކީ ޒިންމާދާރު ރައްޔިތުންނަށް ހެދުމަށް ވެސް އެހާ މުހިންމު ދެ ސިފަ އެވެ. މި ދެ ސިފަ ދަރިވަރުންގައި އަށަގެންނެވުމަށް މަސައްކަތް ކުރުމަކީ ހަމައެކަނި މަދްރަސާތަކުގެ ޒިންމާއެއް ނޫނެވެ. އެއީ ބެލެނިވެރިންގެ ވެސް ޒިންމާއެކެވެ. އެހެންކަމުން އެކަމުގައި މަސައްކަތް ކުރަން ޖެހޭނީ މަދްރަސާ ތަކާއި ބެލެނިވެރިން ގުޅިގެންނެވެ. ހެޔޮ ނަތީޖާ ނެރުމުގެ މާތް މަގުޞަދުގަ އެވެ.

މި ލިޔުމުގައި އަޅުގަނޑު ފުރަތަމަ ބަލާލާނީ ދަރިވަރުންނަށް ރަނގަޅު ތަރުބިއްޔަތާއި ރިވެތި އަޚްލާގުގެ މުހިންމު ކަމުގެ މައްޗަށެވެ. އެ އަށް ފަހު، ދަރިވަރުންގެ ކިބައިގައި އެ ކަންކަން އަށަގެންނެވުމުގައި މަދްރަސާ ތަކާއި ބެލެނިވެރިންނަށް އޮތް ރޯލުގެ މައްޗަށެވެ.

އެއްވެސް ޝައްކެއް ނެތް ގޮތުގައި ހެޔޮތަރުބިއްޔަތު އުގަންނައިދެނީ ދަރިވަރުންގެ ކާމިޔާބީ އަށް މުހިންމު ހުނަރު ތަކެކެވެ. އެއީ ތިމާގެ ނަފްސު ކޮންޓްރޯލް ކުރުމާއި ވަގުތު މެނޭޖް ކުރުމާއި މަސައްކަތަށް ފަރުވާތެރިވުމުގެ ހުނަރެވެ. ކަމަށް ކަމޭހިތުމާއި މައިން ބަފައިންނާއި އަނެކުންނަށް އިހުސާންތެރިވުމާއި އެދުރުންނަށް އިހުތިރާމް ކުރުމާއި ކަމޭހިތުމާއި މުޖުތަމައުގެ އާދަކާދަތަކަށް ބޯލަނބައި ނެގެހެއްޓުމާއި ދުވަސްވީ މީހުންނާއި ރައްޓެހީންނާއި ރަހުމަތްތެރީންގެ މައްޗަށް ކުލުނުވެރިވުމެވެ. މިއީ އަނެކުންގެ ލޯތްބާއި އިޙްތިރާމް ހާސިލް ކުރުމަށް ދަރިވަރުން ދަސްކޮށް ދަމަހައްޓަން ޖެހޭ ސިފަތަކެކެވެ. މިއީ ދަރިވަރުންގެ އުނގެނުމުގެ މާހައުލަށް ވެސް މުހިންމު ސިފަތަކެކެވެ.

އެއީ ކުލާހުގައި ކަނުލައި އެހުމާއި ބަހުސްތަކުގައި ބައިވެރިވުމާއި އެދުރުން ހަވާލުކުރާ މަސައްކަތްތައް ބަރާބަރަށް ނިންމަމުން ގެންދިއުމަށް އެޅޭ ވަރުގަދަ ބިންގަލަކަށް ވާތީ އެވެ. މީގެ ނަތީޖާއަކަށް ވާނީ ދަރިވަރުންނަކީ މައުލޫމާތު މުއްސަނދި ބަޔަކަށް ވެގެން ދިއުމެވެ. ބުއްދީގެ ތޫނުފިލިކަން ބޮޑުބަޔަކަށް ވެގެން ދިއުމެވެ. އުނގެނުމުގެ ރޮނގުގައި ރަން ވަނަތަކެއް ހާސިލުކުރާ ކުދިބަޔަކަށް ވެގެން ދިއުމެވެ.

ރިވެތި އަޚްލާގާ މެދު ވިސްނާލާއިރު، އެއީ ދަރިވަރުންގެ ޝަޚްޞިއްޔަތު ބައްޓަންކޮށް، ބިނާކުރަމުން ގެންދިއުމަށް އެހާމެ މުހިންމު އެއްޗެކެވެ. ކޮންމެ މުޖުތަމައެއްގައި ވެސް އެ މުޖުތަމައެއްގައި ހުއްދަ ކަންކަމާއި ހުއްދަ ނޫން ކަންކަން، މީހުން ގަބޫލުކުރާ ކަންކަމާއި ގަބޫލު ނުކުރާ ކަންކަން އަދި މީހުން ބަލައިގަންނަ ކަންކަމާއި ބަލައިނުގަންނަ ކަންކަން ހުރެ އެވެ. މީހުން ދިރުވައި ދަމަހައްޓާ ކަންކަން ހުރެ އެވެ. އާދަކާދަތަކެއް ހުރެ އެވެ. އެ ހުރިހާ ކަމެއް ޖުމްލަކޮށް، އެ އަށް ކިޔައި އުޅެނީ ސަގާފަތެވެ. ސަގާފަތުގެ ތެރޭގައި އަގީދާއާ ގުޅޭ ކަންކަން ވެސް ހިމެނެ އެވެ. ރިވެތި އަޚުލާގަކީ މި ދެންނެވި ކަންކަމުގެ މިންގަނޑަށް ފެތޭ ކަންކަމެވެ.

އެހެންކަމުން، އެ މިންގަނޑުތަކަށް ދަރިވަރުން އަހުލުވެރި ކުރުމާއި އެ ކުދީންގެ ގުޅުންތަކާއި އަމަލުތަކާއި މުއާމަލާތްތައް އެ ގިއުގަނޑުގެ ތެރޭގައި ގެންގުޅެން ދަސްކޮށްދިނުމަކީ ވަރަށް މުހިއްމު ކަމެކެވެ. އެއީ، އަނެކުން ބަލައިގަންނަ، އިތުބާރުކުރާ، ކަމޭހިތާ އަދި ލޯބިވާ ބަޔަކަށް ދަރިވަރުން ހެދުމަށްޓަކަ އެވެ. އެކަން ނުކުރެވިއްޖެ ނަމަ ތަޢުލީމެއް ހުއްޓަސް އެ ދަރިވަރުންނަކީ މީހުން ގާތު މަގުބޫލު ބަޔަކަށް ނުވެދިއުމަކީ ގާތް ކަމެކެވެ.

އެހެން ވެއްޖެ ނަމަ ބެލެނިވެރިންނާއި މުދައްރިސުންނާއި މަދަރުސާތަކުގެ މަސައްކަތް ބޭކާރުވެގެން ދާނެ ކަމީ އެއްވެސް ޝައްކެއް އޮތް އޮތްކަމެއް ނޫނެވެ. އެކަން ވާނީ ބަރުދާސްތު ކުރަން ވަރަށް ބޮޑު ވޭނަކަށެވެ.

ހެޔޮތަރުބިއްޔަތާއި ރިވެތި އަޚްލާގު ކުދިންގެ ގައިގައި އަށަގެންނެވުމުގައި މަދްރަސާތަކާއި ބެލެނިވެރިންގެ ރޯލަކީ ވަރަށް މުހިއްމު ރޯލެކެވެ. ޢިލްމާއި ހުނަރާއި މަކަތައް ކުދިންނަށް ފޯރުކޮށްދޭ ފަރާތަކީ މަދްރަސާތަކެވެ. ކިޔެވުމުގެ މާހައުލުގެ ގަވައިދުތަކާއި އުސޫލުތައް އެކުލަވައިލާ ހިންގާ ފަރާތަކީ މަދްރަސާތަކެވެ. އެ ކަންކަމަށް ކުދިން ބޯލަނބައިތޯ ބަލައި ދަސްކޮށްދިނުމަކީ މަދްރަސާތަކުގެ ޒިންމާ އެކެވެ. އަދި މަދްރަސާތަކުގެ ފަރާތުން މުދައްރިސުންގެ ޒިންމާއެކެވެ. ބޯލެނބުމުގައި މަންފާ އޮތީ ދަރިވަރުންނަށްކަން އެ ކުދިންނަށް ހަދާން ކޮށްދީ، އެކަން ވިސްނައިދީ، އެ ކުދިންގެ ކިބައިގައި އެ އާދަތައް އަށަގެންނެވުމުގައި މުދައްރިސުންގެ ދައުރު ބޮޑުކަން ފާހަގަކޮށްލެވެ އެވެ. ވަށައިޖެހޭ ތައުލީމެއްގެ މަންފާ ހަގީގަތުގައި ފެންނާނީ އޭރުންނެވެ.

މަދްރަސާ އިން ބޭރުގައި ދަރިވަރުން ހޭދަކުރާ ވަގުތުތަކަކީ ބެލެނިވެރިންގެ ބެލުމުގައި ދަރިވަރުން ހޭދަކުރާ ވަގުތު ތަކެކެވެ. އެއީ ނިސްބަތުން ގިނަ ވަގުތު ތަކެކެވެ. އެހެންކަމުން، ރަނގަޅު ތަރުބިއްޔަތާއި ރިވެތި އަޚުލާގުގެ ވެރިބަޔަކަށް ދަރިވަރުން ހެދުމަށް މަދްރަސާތަކުން ކުރާ މަސައްކަތްތަކުގައި ބެލެނިވެރިންގެ ޒިންމާ ވަރަށް ބޮޑެވެ. މަދްރަސާތަކާއި މުދައްރިސުންނާއި ބެލެނިވެރީން އަތުގުޅާލައިގެން މި ކަމުގައި މަސައްކަތް ކުރަން ޖެހެނީ އެހެން ވެގެންނެވެ. އެއްބަޔަކު އަނެއްބަޔަކަށް މަދަދުވެރި ވާންޖެހެނީ އެހެން ވެގެންނެވެ.

އަޅުގަނޑު ދެކޭ ގޮތުގައި، އެ ރޮނގުން މަސައްކަތް ކުރެވިއްޖެ ނަމަ ގޮތްފޮތް ހުރި، ތަޢުލީމީ ދަރިންތަކެއް ބިނާކުރަމުން ގެންދިއުމަކީ ދާދި ފަސޭހަ ކަމެކެވެ. ބޭނުންވަނީ އެ ބައެއްގެ ދައުރު ދެނެގަނެ، އެ ދައުރު ފުރިހަމަ ގޮތުގައި އަދާކުރަމުން ގެންދިއުމެވެ. އެ ކަމުގައި އެއް އަމާޒަކަށް ގުޅިގެން މަސައްކަތް ކުރަމުން ގެންދިއުމެވެ. މިއީ ވަކި ބަޔަކު ކުރަންޖެހޭ ކަމެއް ކަމުގައި ނުދެކި އެންމެން ގުޅިގެން މަސައްކަތް ކުރުމެވެ.

އެޑިޓަރުގެ ނޯޓް: މިއީ އަޙްމަދިއްޔާ އިންޓަނޭޝަނަލް ސްކޫލްގެ ޕްރިންސިޕަލް މުޙައްމަދު ރަޝީދު "މިހާރު"ގެ ސްކޫލް ގައިޑަށް ލިޔުއްވާފައިވާ ލިޔުއްވުމެކެވެ.