ލިޔުނީ: ޢައިޝަތު ހަމީޒް
ތަޢުލީމާއި ޒުވާނުންގެ ތަރައްޤީއަށް ފުންކޮށް އަޅާލާ މީހެއްގެ ހައިސިއްޔަތުން، އަޅުގަނޑު ގަބޫލުކުރަނީ އަދަބު ހަމައެކަނި ގަވާއިދުތައް ތަންފީޒުކުރުމެއް ނޫންކަމަށެވެ. އެއީ ދަރިވަރުންގެ ކިބައިގައި ޒިންމާދާރުކަމާއި، އިޙްތިރާމާއި، ކެތްތެރިކަން އަށަގެންނެވުމެވެ. ބޯޑުގައި ޚިދުމަތްކުރުމަށް ހޮވިއްޖެނަމަ، އަޅުގަނޑުގެ މައިގަނޑު އަމާޒުތަކުގެ ތެރޭގައި ދެމެހެއްޓެނިވި، ދަރިވަރުންނަށް އަމާޒުކުރެވިފައިވާ ގޮތެއްގައި ދަރިވަރުންގެ އަދަބު ރަނގަޅުކުރުމަށް ހިންގޭ މަސައްކަތްތަކަށް އެހީތެރިވުން ހިމެނެއެވެ. މި ގޮތުން އަޅުގަނޑުގެ ތަޞައްވަރު ތިރީގައި އެވަނީއެވެ.
1. ސާފު، އެއްގޮތް އުންމީދުތަކެއް ގާއިމުކުރުން
އަދަބު ފެށެނީ ސާފުކަމުންނެވެ. ސްކޫލްތަކުން ވަރަށް ސާފުކޮށް ބަޔާންކޮށްފައިވާ އަޚްލާޤީ އުންމީދުތަކެއް ގާއިމުކުރަންޖެހެއެވެ. މިއީ ލީޑަރޝިޕުން ފެށިގެން މުދައްރިސުން، ބެލެނިވެރިން އަދި ދަރިވަރުންނާ ހަމައަށް އެއްގޮތަކަށް މުޢާމަލާތްކުރެވޭ ކަންކަމެވެ. މި އުންމީދުތަކަކީ ސްކޫލްގެ ސަގާފަތުގެ ބައެއްގެ ގޮތުގައި، އެސެމްބްލީތަކާއި، ކްލާސްރޫމްގެ މުޢާމަލާތްތަކާއި، ދުވަހުގެ އާދަކާދައިގެ ތެރެއިން ހަރުދަނާކުރެވޭ ކަންކަމަށް ވާންޖެހެއެވެ.
2. މެންޓަރޝިޕް އަދި ކައުންސެލިންގ ގެ ދައުރު ވަރުގަދަކުރުމަށް މަސައްކަތް ކުރުން
މި ގޮތުން ގިނަ އަދަބީ މައްސަލަތައް އުފެދެނީ ނަފްސާނީ ނުވަތަ އިޖްތިމާޢީ ބޭނުންތައް ފުރިހަމަ ނުވުމުގެ ސަބަބުންނެވެ. ކޮންމެ ދަރިވަރަކަށްވެސް ތަމްރީނު ލިބިފައިވާ މެންޓަރ އެއް ނުވަތަ ކައުންސެލަރެއްގެ އިރުޝާދު ލިބެންވާނެއެވެ. ޚާއްޞަކޮށް އެކި ބާވަތުގެ އަމިއްލަ އަދި ތަޢުލީމީ ޕްރެޝަރތަކާ ކުރިމަތިލާންޖެހޭ ޅަފުރައިގެ ދުވަސްވަރުގައެވެ. ޕާސްޓޯރަލް ކެއަރއަށް އިންވެސްޓްކުރުމުން އަދަބު ރަނގަޅުވުމުގެ އިތުރުން ދަރިވަރުންގެ ޖުމްލަ ދުޅަހެޔޮކަންވެސް އިތުރުވާނެއެވެ.
-
ޕޮޒިޓިވް ރީއިންފޯސްމަންޓް އިތުރުކުރުން
ރަނގަޅު އަޚްލާޤަށް ހިތްވަރުދީ އެކަން ފާހަގަކުރުމަކީ ނުރަނގަޅު އަޚްލާޤަށް އަދަބުދިނުމަށްވުރެ ގިނަފަހަރު ފައިދާހުރި ކަމެކެވެ. ސްކޫލްތަކުން އިޙްތިރާމާއި، ޒިންމާދާރުކަމާއި، ލީޑަރޝިޕް ދައްކުވައިދޭ ލީޑަރޝިޕް ރޯލްތައް މެދުވެރިކޮށް ހިތްވަރުދޭ ނިޒާމެއް ސްކޫލް މާހައުލްގައި ޤާއިމްކުރުމަށް ލިބޭ ފުރުޞަތެކެވެ. މިގޮތުން މިއީ ދަރިވަރުން މިފަދަ ކަންކަމަށް އަހުލުވެރިކުރުވައި އަދި ކުދިން އަމިއްލަ އަށް އިޞްލާޙުވުމަށް މަސައްކަތްކުރާ، އެ ސަގާފަތެއް ބިނާކުރުމަށް މަގުފަހިވާނެ ކަމެކެވެ.
4. ބެލެނިވެރިންގެ ބައިވެރިވުން އިތުރުކުރުން
ސްކޫލާއި ގޭގައި އެއްގޮތަކަށް ކަންކަން ގެންދާނަމަ އަޚްލާޤީ ތަރުބިއްޔަތު އެންމެ ފައިދާހުރި ގޮތުގައި ކުރިއަށްދާނެއެވެ. މުދައްރިސުންނާއި ބެލެނިވެރިންގެ މެދުގައި ގަވާއިދުން މުޢާމަލާތްކުރުމާއި، ބޮޑެތިވަމުން އަންނަ ދަރިވަރުންގެ އަޚްލާޤާ ގުޅޭ ސްކޫލްގެ ގަވާއިދުތަކާ ގުޅޭ ގޮތުން އެއް މެސެޖެއް ދިނުމަކީ ދަރިވަރުންނަށް އެއްގޮތަކަށް ކަންކަން ކުރިއަށްދާކަން ޔަޤީންކުރެވޭނެ ގޮތެކެވެ.
5. ލީޑަރޝިޕްގެ ފުރުޞަތުތައް ހޯދައިދިނުން
ޒިންމާ ޙަވާލުކުރެވޭ ދަރިވަރުން ޒިންމާދާރު ގޮތުގައި ޢަމަލުކުރުމުގެ ފުރުޞަތު ބޮޑެވެ. ޕްރިފެކްޓް ނިޒާމާއި، ސްޓޫޑަންޓް ކައުންސިލްތަކާއި، ޕިއަރ މެންޓަރިންގ ޕްރޮގްރާމްތަކަކީ ލީޑަރޝިޕް ހުނަރުތައް ތަރައްޤީކުރުމުގެ އިތުރުން އެހެން ދަރިވަރުންނަށް ރަނގަޅު މިސާލަކަށްވެސް ވާނެއެވެ.
6. ނޭދެވޭ އަމަލުތަކުގެ އަސްލު ސަބަބުތަކަށް ރިއާޔަތްކުރުން
އެންމެ ފަހުން، އަދަބު ދިނުމުގެ ސްޓްރެޓެޖީތަކުގައި ހަމައެކަނި ފެންނަ ކަންތައްތަކަށް ބެލުމުގެ ބަދަލުގައި އޭގެ އަސްލު ސަބަބުތަކަށް – އެއީ ދަސްކުރުމުގެ ދަތިކަމެއް، ފުރައްސާރަކުރުން، ނުވަތަ ގޭގައި ދިމާވާ މައްސަލަތަކެއް ކަމުގައިވިޔަސް – ރިއާޔަތްކުރަންޖެހެއެވެ. ކޮންމެ ކޭސްއަކަށް ވަކިން ރިއާޔަތްކޮށް އަޅާ ފިޔަވަޅުތަކަކީ އިންސާފުވެރިކަން ކަށަވަރުކޮށްދޭ، އަދި ދަރިވަރުންނަށް އެކަހެރިވެފައިވާ ނުވަތަ އޮޅުންއަރާފައިވާކަމުގެ އިހްސާސް ނުކުރެވޭނެ ގޮތެކެވެ.
ނިންމާލުމުގެ ގޮތުން، އަދަބުދިނުން ރަނގަޅުކުރުމަކީ ކޮންޓްރޯލްކުރުމާ ބެހޭ ކަމެއް ނޫނެވެ. އެއީ ސިފަތައް އުފެއްދުމާ ބެހޭ ކަމެކެވެ. ގަވާއިދުތަކާއި، އަޅާލުމާއި، އެއްބާރުލުން އެކުލެވޭ ހަމަހަމަ އުސޫލެއްގެ ތެރެއިން، އަޅުގަނޑުމެންނަށް އަޅުގަނޑުމެންގެ ދަރިވަރުން އިޙްތިރާމްކުރާ، ޒިންމާދާރު ރައްޔިތުންގެ ގޮތުގައި ބިނާކުރެވިދާނެއެވެ. މި ތަސައްވުރު ޙަޤީޤަތަކަށް ހެދުމަށާއި، ސްކޫލްގެ ކުރިއެރުމަށް މުހިންމު ހިއްސާއެއް ކުރުމަށް އަޅުގަނޑު ވަރަށް ޝައުޤުވެރިވަމެވެ.
advertisment
